20 кастрычніка 2015 г. адбылася Рэспубліканская навуковая канферэнцыя «Беларусь у гістарычнай Рэтраспектыве XIX – XXI стагоддзяў: этнакультурныя і нацыянальна-дзяржаўныя працэсы». Гэта адметная навуковая падзея на гістарычным факультэце. Падрыхтоўка мерапрыемства была ўскладзена на кафедру гісторыі Беларусі. Трэба падкрэсліць, што канферэнцыя па гэтай тэматыцы праводзіцца ўжо ў чацвёрты раз і з’яўляецца вынікам руплівай працы айчынных гісторыкаў па актуальных пытаннях беларускай гісторыі і культуры.
У аргкамітэт паступілі заяўкі ад удзельнікаў з розных навуковых і культурна-асветных устаноў Беларусі: НАН Беларусі (Інстытут гісторыі і Цэнтр даследаванняў беларускай культуры, мовы і літаратуры), а таксама БДУ, універсітэтаў Гродна, Брэста, Віцебска, Магілёва, Мазыра. Свае матэрыялы прапанавалі супрацоўнікі музейнай сферы і архіваў праваслаўнай царквы. Усяго цікавасць да канферэнцыі прадэманстравалі каля 50 даследчыкаў з Беларусі (з іх 2 доктары навук і 30 кандыдатаў навук), былі зарэгістраваны два замежныя навукоўцы з Украіны і Расіі (ВНАУ, Вінніца; РДПУ імя Герцэна, Санкт-Пецярбург).
Па матэрыялах канферэнцыі плануецца выданне зборніка артыкулаў, які можа апынуцца карысным не толькі ў навуковай сферы, але і ў працэсе выкладання айчыннай гісторыі.